Assalamualaikom warah matullah
Jaroe dua blah ateuh jeumala
Neusambot saleum kawom metuah
Neusambot bagah ngon hate suka
Alhamdulillah pujoe keu Tuhan
Po makhluk alam sidroe kuasa
Nyang pejuet langen ka dengon alam
Nyang pejuet Adam ngon Siti Hawa
Nibak malam nyoe saban ta pandang
Ka taduek sajan ngon hate suka
Saboh acara untuk ta kenang
Rakan-rakan wartawan nyang ka syuhada
Nibak si uroe kehendak Allah
Nanggroe meutuah geubri bencana
Tangai dua nam buleun dua blah
Aceh metuah geubri lam duka
Bak uroe minggu nibak masanyan
Aceh meu guncang buet geumpa raya
Ureung teumakot dibeudeoh pitam
Ladom ka pangsan bak jalan raya
Hana treb watei teuma ‘oh lheuh nyan
Geubri le Tuhan laen lom bala
Di teuka ie dengon geulumbang
Kehendak bak Tuhan ngon tiba-tiba
Ureung ka karu rata jeut simpang
Inong ngon agam ka haro hara
Peusiblah nyawoeng nibak geulumbang
Hanjeut tabayang tuha ngon muda
Ladom cok aneuk ladom hei abang
Yang ladom rakan peusiblah harta
Ladom ka geu plueng tamong u dalam
Laen bak jalan meu puta-puta
Ladom bak geu plueng ka salah jalan
Na chit hai rakan ka salah raba
Ladom ka geu kliek geu lakee tulong
Geu lakei ampon nibak rabbana
Leumpah that rame nyang jeut ke korban
Meleumpah sayang takalon nyata
Tuha ngon muda inong ngon agam
Ka neu cok pulang le po nyang kuasa
Meunan chit wareh sahabat geutanyoe
Rame nyang ka gewoe lam musibah raya
Nibak uroe nyan ban bengoh uroe
Geu liput berita hai adoe lam geumpa raya
Geu pudep honda kamera bak jaroe
Laju geupantau ban saboh banda
Geu gaseng kenoe geu gaseng keudeh
Ladom temuleh ladom cok gamba
Lagei bang Muharram chit beuhe droe
Menurut ureung nyoe geujak u penjara
U Kajhu geujak laju le sidroe
Kamera bak jaroe geujak cok gamba
Menurut carita penjara ka runtoh
Makajih geu peutroh geujak le sigra
Padahai gobnyan pre nibak uroe nyan
Tapi ka kehendak Tuhan syahid mulia
Tameulakei doa nibak po rabbon
Bang Muharram beu ampon sigala desya
Doa bek putoh takirem sabe
Bek sampe reule meu ube mata
Meunan chit rakan keu Erwiyan Syafri
Bang Sayed Alwi ngon bang Rizal Putra
Cutkak Erismawati Saleh Adami
Aleuhnyan lagi ke bang Najamuddin Uma
Doa ta himpon chit keu aduen Aswin
Bang Muhammad Amin dan Taufan Nugraha
Teuma oh lhueh nyan ke aduen Safwan
Tameulakei ureung nyan beu sabe mulia
Sabah meulimpah ke panitia
Yang ka geuselenggara lagei nyoe rupa
Bang Salman Mardira yang leupah santon
Gobnyan geu himpon geu pike dana
Ke suai breuh chit kana bang Ali
Bang Nurdin hai akhi konsep acara
Masalah santunan na Hendro Saky
Bang Jamal inewstv urusan belanja
Tamelakei sabe nibak po rabbi
Geutanyoe geubri hudep sijahtra
Beujioh ayeb malei ngon keji
Beu sabe Allah bri tanyoe sijahtra
Allah ya rabbon
Beu neu peu ampon
Sahabat kamoe yang ka newoe
Dalam ie raya
Neubri bek susah
Oh uroe page
Oh uroe akhe
Ya Allah neubri sijahtra []
SUBUR DANI, jurnalis di Banda Aceh